உலகின் முக்கிய மதங்களில் ஒன்றான பௌத்தம், இலங்கை மற்றும் இந்தியா உட்பட பல நாடுகளின் கலாச்சார பாரம்பரியத்தை வடிவமைப்பதில் குறிப்பிடத்தக்க பங்கைக் கொண்டுள்ளது. இந்த இரு நாடுகளுக்கும் இடையிலான வரலாற்று உறவுகளும் பகிரப்பட்ட மத மரபுகளும் ஆழமான மற்றும் ஒன்றோடொன்று இணைக்கப்பட்ட பௌத்த பாரம்பரியத்தை வளர்த்துள்ளன. இலங்கைக்கும் இந்தியாவிற்கும் இடையிலான வரலாற்று, கலாச்சார தொடர்புகள் இரு நாடுகளிலும் நீடித்து வரும் அரசியல், கலாசார, பண்பாடுகளின் தாக்கத்தை வலியுறுத்துகிறது.
இலங்கையும் இந்தியாவும் பல ஆயிரம் ஆண்டுகளுக்கு முந்தைய வளமான வரலாற்றைப் பகிர்ந்து கொள்கின்றன. இந்தியாவில் இருந்து இலங்கைக்கு பௌத்தம் பரவியதற்கு கிமு 3 ஆம் நூற்றாண்டில் வாழ்ந்த பேரரசர் அசோகரே காரணம் என்று கூறப்படுகிறது. பேரரசர் அசோகர் புத்த மதத்திற்கு மாறிய பிறகு, புத்தரின் போதனைகளை அறிமுகப்படுத்துவதற்காக தனது மகன் மகிந்தவை இலங்கைக்கு அனுப்பினார். இது இரு நாடுகளுக்கும் இடையிலான ஆழமான தொடர்பின் தொடக்கமாகவும், பௌத்த கலாச்சார பாரம்பரியத்தை ஸ்தாபிப்பதையும் குறித்தது.
இலங்கை மற்றும் இந்தியா ஆகிய இரண்டு நாடுகளும் உலகெங்கிலும் உள்ள பக்தர்களையும், யாத்ரீகர்களையும் ஈர்க்கும் புனித பௌத்த தலங்களை கொண்டுள்ளன. இலங்கையின் மிகவும் குறிப்பிடத்தக்க புனித யாத்திரை ஸ்தலம் கண்டியில் உள்ள தலதா மாளிகையாகும். இது புத்தரின் புனிதப் பல்லை நினைவுச்சின்னமாக கொண்டுள்ளது. இதேபோல், புத்த மதத்தின் பிறப்பிடமான இந்தியாவில், புத்தர் ஞானம் பெற்ற புத்தகயா மற்றும் அவர் தனது முதல் பிரசங்கத்தை வழங்கிய சாரநாத் போன்ற பல தளங்கள் முக்கியத்துவத்தைக் கொண்டுள்ளன. இந்த தளங்கள் இலங்கை மற்றும் இந்தியாவின் பௌத்த பாரம்பரியத்தை இணைக்கும் கலாசார பண்பாட்டின் பாலங்களாக அமைந்துள்ளன.
பௌத்த கட்டிடக்கலைகள் இலங்கை மற்றும் இந்தியாவின் கலாச்சார பாரம்பரியத்தில் அழியாத முத்திரையை பதித்துள்ளன. இலங்கையில் உள்ள அனுராதபுரம் மற்றும் பொலன்னறுவையின் பண்டைய இராச்சியங்கள் ருவன்வெலிசாய மற்றும் ஜேதவனாராமய போன்ற பழமையான பௌத்த ஸ்தூபிகளைக் கொண்டுள்ளன.
இலங்கையின் பௌத்த கட்டிடக்கலையின் அடித்தளங்களாக, இந்திய பௌத்த கட்டிடக்கலையின் தாக்கமே அடையாளமாகியிருக்கின்றது. இவை இரு நாடுகளினதும் பகிர்ந்து கொள்ளப்பட்ட கலாச்சார பாரம்பரியத்தை பிரதிபலிக்கிறது. அதேபோல், இந்தியாவின் பழமையான குகை சிற்பங்களான அஜந்தாவும், எல்லோராவும் திகழ்கின்றன. இவை மிகவும் நுணுக்கமான பௌத்த சிற்பங்களால் அலங்கரிக்கப்பட்டுள்ளன. இரு நாடுகளுக்கும் இடையிலான மத, கலை, கலாசார பாரம்பரிய தொடர்புகளை இவை எடுத்துக் காட்டுகின்றன.
இந்திய, இலங்கை மத, கலாசார பண்பாட்டு பரிமாற்றத்திற்கு சிறந்த அடையாளமாக அஜந்தா குகைகள் திகழ்கின்றன. அஜந்தா கலை வடிவங்களைக் கொண்ட கோயில்கள் இந்தியாவின் மகாராஷ்டிரா மாநிலத்தில் அமையப்பெற்றிருக்கின்றன.
இதில் புத்த மத சிற்பங்களும், கலை வடிவங்களும் காணப்படுகின்றன. இவை கற்களில் குடைந்து உருவாக்கப்பட்ட குடைவரைக் கோயில்கள் ஆகும். மராட்டிய மாநிலம் அவுரங்காபாத்தில் இருந்து 107 கி.மீ தொலைவில் உள்ள அழகான அஜந்தா என்ற கிராமத்தில் இவை அமையப்பெற்றுள்ளன . அஜந்தா கிராமத்திலிருந்து 12கி.மீ தொலைவில் காணப்படும் குடைவரைக் குகைகள் அமைந்துள்ள இடம் இந்த கிராமத்தின் பெயரால் அஜந்தா குகைகள் என அழைக்கப்படுகின்றன.
அஜந்தா குகை ஓவியங்களும், கலை வடிவங்களும் புத்தமதக் கொள்கைகளை முதன்மைப்படுத்தியும், புத்தரின் வாழ்க்கை வரலாற்று சம்பவங்களை சித்தரித்தும் உருவாக்கப்பட்டவையாகும். குகைகளை முன்பு மழைக்காலத்தில் ஓய்வெடுக்கும் இடமாக புத்தபிக்குகள் பயன்படுத்தி வந்துள்ளனர். கி.மு.2 முதல் கி.பி. 6 ஆம் நூற்றாண்டு வரையிலான காலத்தில் பல்வேறு கட்டமாக இவை உருவாக்கப்பட்டுள்ளன. இன்று இவை இந்தியத் தொல்பொருள் துறையினரால் பராமரிக்கப்பட்டு வருகின்றன.
அதே போல, இந்திய இலங்கை கலை கலாசார பண்பாட்டை பிரதிபலிக்கும் மற்றுமொரு அடையாளம்தான் எல்லோரா குகை. இந்திய மாநிலமான மகாராஷ்டிராவில் அமைந்துள்ள இந்த குடைவரைவு சிற்பங்கள் உள்ள குன்றுகள், ஒரு தொல்லியற் களமாக திகழ்கிறது. இது அவுரங்காபாத், மகாராட்டிரம் நகரிலிருந்து 90 கிமீ தொலைவில் உள்ளது. ராஷ்டிரகூட மரபினரின் ஆட்சிக் காலத்தைச் சேர்ந்த இந்த தளம் புகழ் பெற்ற குடைவரைகளைக் கொண்டு விளங்குகிறது. எல்லோரா ஒரு உலக பாரம்பரிய தளமாகவும் கருதப்படுகிறது.
எல்லோரா சிற்ப வடிவங்கள் இந்தியக் குடைவரைக் கட்டிடக்கலையின் முன்னோடி ஆக விளங்குகிறது. சரணந்திரிக் குன்றுகளின் நிலைக்குத்தான பாறைகளில் குடையப்பட்டுள்ள 34 குகைகள் இங்கே உள்ளன. இக் குகைகளிலே பௌத்த, இந்து மற்றும் சமணக் கோயில்களும், துறவு மடங்களும் அமைந்துள்ளன. இவை கி.பி. 5 ஆம் நூற்றாண்டுக்கும் 10 ஆம் நூற்றாண்டுக்கும் இடையில் அமைக்கப்பட்டவையாக கருதப்படுகின்றன. இவற்றில் 12 பௌத்த குகைகள், 17 இந்துக் குகைகள், மற்றும் 5 சமணக் குகைகள் அருகருகே அமைந்துள்ளதானது அக்காலத்தில் நிலவிய சமய நல்லிணக்கத்தை எடுத்துக் காட்டுவதாகக் கருதப்படுகின்றது. இது இந்திய தொல்லியல் ஆய்வகத்தின் கீழ் பாதுகாக்கப்பட்ட சின்னமாக பாதுகாக்ப்பட்டு வருகிறது.
பௌத்தத்தில் துறவறம் ஒரு முக்கிய பங்கைக் கொண்டுள்ளது. மேலும் இலங்கை மற்றும் இந்தியா நீண்டகால துறவற மரபுகளைக் கொண்டுள்ளன. பௌத்தத்தின் தேரவாத சிந்தனைப் பிரிவு இலங்கையில் பிரதான இடத்தைப் பெற்றுள்ளது. அதே சமயம் தேரவாத மற்றும் மகாயான மரபுகள் இரண்டும் இந்தியாவின் வெவ்வேறு பகுதிகளில் நடைமுறையில் உள்ளன. இலங்கை மற்றும் இந்திய பௌத்த துறவிகளுக்கு இடையிலான மடாலய பரிமாற்றங்கள், புனித யாத்திரைகள் மற்றும் அறிவார்ந்த உரையாடல்கள் பௌத்த போதனைகளின் ஆழமான புரிதலையும் பாதுகாப்பையும் வளர்த்தெடுத்துள்ளன. துறவற வாழ்க்கை முறைக்கான பகிரப்பட்ட அர்ப்பணிப்பு இந்த நாடுகளுக்கு இடையிலான கலாசார பிணைப்புகளை வலுப்படுத்தியுள்ளன.
பௌத்தம் இலங்கையிலும் இந்தியாவிலும் இலக்கியம் மற்றும் மொழிகளின் வளர்ச்சிக்கு பங்களித்துள்ளது. ஆரம்பகால பௌத்த நூல்களுக்குப் பயன்படுத்தப்பட்ட பாலி மொழி, இலங்கையில் மத வழிபாடுகளுடன் கலந்து நடைமுறையில் இருக்கிறது. தேரவாத பௌத்தத்தின் புனித நூலான திரிபிடகம் இலங்கை பௌத்தர்களின் வாழ்வியலில் முக்கிய இடத்தைப் பெற்றுள்ளது.
இந்தியாவில், மகாயான சூத்திரங்கள் போன்ற பண்டைய பௌத்த நூல்கள் இலக்கியம் மற்றும் தத்துவ சிந்தனைகளில் பெரும் தாக்கத்தை செலுத்தியுள்ளன. பௌத்த நூல்களின் பரவல் மற்றும் பௌத்த தத்துவத்தின் ஆய்வு ஆகியவை அறிவுசார் பரிமாற்றங்களை எளிதாக்கியுள்ளதோடு இரு நாடுகளின் கலாச்சார பாரம்பரியத்தையும் வளப்படுத்தியுள்ளது.
இலங்கையையும் இந்தியாவையும் இணைக்கும் பௌத்த கலாசார பாரம்பரியம் இந்த நாடுகளுக்கிடையிலான ஆழமான வரலாற்று உறவுகளுக்கும் பகிரப்பட்ட சமய மரபுகளுக்கும் சான்றாகும். பௌத்தம் இரு நாடுகளிலும் கலை, பண்பாடு, கட்டிடக்கலை, இலக்கியம், மொழி மற்றும் நடைமுறைகளில் செல்வாக்கு செலுத்தும் ஒரு சக்தியாக செயல்படுகிறது.
புனிதத் தலங்கள், யாத்திரை மையங்கள் மற்றும் கலாசாரப் பரிமாற்றங்கள் இலங்கை மற்றும் இந்திய பௌத்தர்களுக்கு இடையிலான பிணைப்பை வலுப்படுத்தியுள்ளதுடன், அவர்களின் கலாசார பாரம்பரியத்தைப் பற்றிய பகிரப்பட்ட புரிதலையும் பண்பாட்டையும் வளர்க்கிறது. இந்த மரபின் பாதுகாவலர்கள் என்ற வகையில், இலங்கையும் இந்தியாவும் எதிர்கால சந்ததியினருக்காக தங்களுடைய ஒன்றோடொன்று இணைக்கப்பட்ட பௌத்த பாரம்பரியத்தை தொடர்ந்து பேணிக்காப்பதும் பாதுகாப்பதும் இன்றியமையாததாகும்.
பௌத்தம் இந்தியாவையும் இலங்கையையும் ஆன்மிகப் பாரம்பரியத்தின் பொதுவான இழையில் இணைக்கும் ஒரு உயிருள்ள மரபுரிமையாகத் தொடர்கிறது. புத்த போதனைகளின் நடைமுறை மற்றும் பிரச்சாரம் புத்தர் உலகிற்கு வழங்கிய ஆழ்ந்த ஞானத்தையும் இரக்கத்தையும் நினைவூட்டுகிறது.
பௌத்த மதத்தின் மூலம் இரு நாடுகளுக்கும் இடையிலான வரலாற்று உறவுகள் கடந்த காலத்தின் நிகழ்வாக இல்லாமல், இரு நாட்டு சமூகங்களின் நிகழ்காலத்தையும் எதிர்காலத்தையும் வடிவமைக்கும் ஒரு தொடர்ச்சியான இணைப்பாக இருக்கிறது என்றால் அது மிகையாகாது.
பௌத்தம் இந்தியாவிற்கும் இலங்கைக்கும் இடையே ஒரு பாலமாக செயல்படுகிறது. காலத்தையும் இடத்தையும் கடந்து, பகிரப்பட்ட நம்பிக்கைகள், மதிப்புகள் மற்றும் நடைமுறைகள் மூலம் இரு தெச மக்களையும் இணைக்கிறது. இந்தியாவிலிருந்து இலங்கைக்கு பௌத்தத்தின் வருகை இரு நாடுகளின் ஆன்மீக, கலாச்சார மற்றும் சமூக கட்டமைப்பில் ஒரு அழியாத முத்திரையை பதித்துள்ளது.
– சூரியா
