Tuesday, May 28, 2024
Home » IPL 2024 CSK vs LSG: ஹெட்ரிக் தோல்வியை தவிர்க்குமா லக்னோ

IPL 2024 CSK vs LSG: ஹெட்ரிக் தோல்வியை தவிர்க்குமா லக்னோ

by Prashahini
April 19, 2024 10:15 am 0 comment

IPL T20 கிரிக்கெட் தொடரில் இன்று (19) இரவு 7.30 மணிக்கு லக்னோவில் உள்ள ஏகானா மைதானத்தில் நடைபெறும் ஆட்டத்தில் நடப்பு சாம்பியனான சென்னை சூப்பர் கிங்ஸ், லக்னோ சூப்பர் ஜெயண்ட்ஸுடன் மோதுகிறது.

கே.எல்.ராகுல் தலைமையிலான லக்னோ சூப்பர் ஜெயண்ட்ஸ் அணியானது 6 ஆட்டங்களில் விளையாடி 3 வெற்றி, 3 தோல்விகளுடன் 6 புள்ளிகள் பெற்று பட்டியலில் 5ஆவது இடத்தில் உள்ளது. அடுத்தடுத்து இரு தோல்விகளை சந்தித்த நிலையில் இன்றைய ஆட்டத்தை அணுகுகிறது லக்னோ அணி. துடுப்பாட்டத்தை பொறுத்தவரையில் தொடர்ச்சியாக இரு அரை சதங்கள் அடித்த குயிண்டன் டி காக் கடைசி 3 ஆட்டங்களிலும் கூட்டாக 35 ஓட்டங்கள் மட்டுமே சேர்த்தார்.

கே.எல்.ராகுலிடம் இருந்து தாக்கத்தை ஏற்படுத்தக்கூடிய அளவிலான மட்டை வீச்சு வெளிப்படுவது இல்லை. 6 ஆட்டங்களில் 138 ஸ்டிரைக் ரேட்டுடன் 204 ஓட்டங்கள் எடுத்துள்ள கே.எல்.ராகுல் பாதுகாப்பு உணர்வுடன் விளையாடும் விதம் அணியின் ரன் குவிப்பை வெகுவாக பாதிப்பதாக உள்ளது. இம்பாக்ட் பிளேயர் விதியின் கீழ் பயன்படுத்தப்படும் கிருணல் பாண்டியா பெரும்பாலும் 7ஆவது வீரராகவே பேட்டிங்கில் களமிறங்குகிறார்.

6 ஆட்டங்களிலும் கூட்டாக அவர், 41 பந்துகளை மட்டுமே எதிர்கொண்டுள்ளார். நடுவரிசை துடுப்பாட்டத்தில் இடது கை பேட்ஸ்மேனாக பலம் சேர்க்கக்கூடிய கிருணல் பாண்டியாவுக்கு பினிஷர் ரோல் என்பது பொருத்தமற்றதாக மாறி உள்ளது. இந்த விஷயத்தில் அணிநிர்வாகம் சற்று ஆலோசிக்கக்கூடும். மேலும் தீபக் ஹூடாவிடம் இருந்து எதிர்பார்த்த அளவிலான செயல்திறன் வெளிப்படவில்லை. ஒரு சிலஆட்டங்களில் கைகொடுத்த மார்கஸ் ஸ்டாயினிஸ், ஆயுஷ் பதோனி, நிகோலஸ் பூரன் ஆகியோரிடம் இருந்து தொடர்ச்சியான செயல் திறன் இல்லை.

பந்து வீச்சை பொறுத்தவரையில் 150 கிலோ மீட்டர் வேகத்தில் சீராக வீசக்கூடிய மயங்க்யாதவ் காயம் காரணமாக கடந்த இரு ஆட்டங்களாக விளையாடவில்லை. வயிற்று பகுதியில் ஏற்பட்ட காயத்தில் இருந்து மீண்டு வரும் 21 வயதான மயங்க் யாதவ் நேற்று பயிற்சியில் ஈடுபட்டார். இதனால் அவர், இன்றைய ஆட்டத்தில் களமிறங்க வாய்ப்பு உள்ளது.

அவர், களமிறங்கும் பட்சத்தில் அணியின் பந்து வீச்சு கூடுதல் வலுப்பெறும். சுழற்பந்து வீச்சில் ரவி பிஷ்னோய் ரன் குவிப்பை கட்டுப்படுத்துபவராக உள்ளார். இருப்பினும் இன்றைய ஆட்டத்தில் அவருக்கு ஷிவம் துபேவின் பேட்டிங் அச்சுறுத்தலாக இருக்கக்கூடும்.

ருதுராஜ் கெய்க்வாட் தலைமையிலான சென்னை சூப்பர் கிங்ஸ் அணி 6 ஆட்டங்களில் விளையாடி 4 வெற்றி, 2 தோல்விகளுடன் 8 புள்ளிகள் பெற்று பட்டியலில் 3ஆவது இடத்தில் உள்ளது. அடுத்தடுத்து இரு வெற்றிகளை பெற்ற நிலையில் இன்றைய ஆட்டத்தை சந்திக்கிறது CSK. மும்பை இந்தியன்ஸ் அணிக்கு எதிரான ஆட்டத்தில் 40 பந்துகளில் 69 ஓட்டங்கள் விளாசிய ருதுராஜ் கெய்க்வாட், 38 பந்துகளில், 66 ஓட்டங்கள் விளாசிய ஷிவம் துபே ஆகியோரிடம் இருந்து மீண்டும் ஒரு சிறந்த இன்னிங்ஸ் வெளிப்படக்கூடும்.

டாப் ஆர்டரில் ரச்சின் ரவீந்திரா, அஜிங்க்ய ரஹானே, டேரில் மிட்செல் ஆகியோரிடம் இருந்து தொடர்ச்சியான செயல்பாடு இல்லை.இவர்களும் ஒருங்கிணைந்து விளையாடும் பட்சத்தில் அணியின் பேட்டிங் கூடுதல் வலுவடையும். இதில் டேரில் மிட்செல் பந்துகளுக்கு நிகராகவே ஓட்டங்கள் சேர்ப்பது இறுதிக்கட்ட ஓவர்களில் அணியின் ஓட்ட குவிப்பை மந்தமாக்குகிறது. அதேவேளையில் தோனி குறைந்த பந்துகளில் அதிக ஓட்டங்களை வேட்டையாடுவது அணிக்கு உதவியாக உள்ளது.

லக்னோ ஆடுகளம் சுழற்பந்து வீச்சுக்கு கைகொடுக்கும் என்பதால் இன்றைய ஆட்டத்தில் ஜடேஜாவுடன், தீக்சனாவும் களமிறங்கக்கூடும்.

வேகப்பந்து வீச்சில் முஸ்டாபிஸுர் ரஹ்மான் தொடக்க ஓவர்களிலும், மத்தீஷ பத்திரண இறுதிக்கட்ட ஓவர்களிலும் லக்னோ பேட்டிங் வரிசைக்கு அழுத்தம் கொடுக்கக்கூடும்.

மேலும் செய்திகள்...

Leave a Comment

இலங்கையின் மிகவும் நம்பகமான மற்றும் புதுமையான ஊடக சேவை வழங்குநர்

Facebook

@2024 – All Right Reserved. Designed and Developed by Lakehouse IT