இந்தியாவிடம் தோற்று இலங்கை வெளியேற்றம்

19 வயதுக்கு உட்பட்ட மகளிர் ரி20 உலகக் கிண்ணப் போட்டியில் இந்தியாவிடம் 7 விக்கெட்டுகளால் தோல்வியை சந்தித்த இலங்கை அணி அரையிறுதிக்கு முன்னேறும் வாய்ப்பை இழந்துள்ளது.

தென்னாபிரிக்காவில் நடைபெற்றுவரும் இந்தத் தொடரில் சுப்பர் 6 சுற்றில் தனது முதல் போட்டியாக கடந்த ஞாயிறன்று (22) இந்திய அணியை சந்தித்த இலங்கை இளையோர் மகளிர் அணி முதலில் துடுப்பெடுத்தாட பணிக்கப்பட்டது.

எனினும் இலங்கை அணி 20 ஓவர்களுக்கும் 9 விக்கெட்டுகளை இழந்து 59 ஓட்டங்களையே பெற்றது. அணித் தலைவி விஷ்மி குணரத்ன மாத்திரம் 25 ஓட்டங்களை பெற ஏழு வீராங்கனைகள் ஒற்றை இலக்கத்தையே பெற்றனர்.

பதிலெடுத்தாடிய இந்திய அணி 7.2 ஒவர்களில் 3 விக்கெட்டுகளை இழந்து வெற்றி இலக்கான 60 ஓட்டங்களை எட்டியது.

புள்ளிப்பட்டியலில் எந்தப் புள்ளியையும் பெறாது 5ஆவது இடத்தில் இருக்கும் இலங்கை அணிக்கு மேலும் தென்னாபிரிக்காவுக்கு எதிரான குழு நிலை போட்டி மாத்திரமே எஞ்சியிருக்கும் நிலையில் தொடரில் இருந்து வெளியேறியுள்ளது.