கல்முனை ஆதார வைத்தியசாலையில் சிறப்பாக இயங்கிவரும் இருதய நோய் சிகிச்சைப் பிரிவிற்கு தற்போது புதிய இருதய நோய் நிபுணராக பிரபல வைத்திய நிபுணர் வைத்திய கலாநிதி கசுன் துசியந்த லொகுகெடகொட நியமிக்கப்பட்டுள்ளார்.
கல்முனை ஆதார வைத்தியசாலையின் இருதய நோய் சிகிச்சைப் பிரிவானது பல்வேறுபட்ட வசதிகளுடன் காணப்படுகின்றது. வைத்திய அத்தியட்சகர் வைத்திய கலாநிதி இரா. முரளீஸ்வரன் தலைமையிலான குழுவினர் வைத்தியசாலை வளர்ச்சியில் பெரும் பங்காற்றி வருகின்றனர்.
இங்கு 2D ECHO, Exercise ECG, 24 Hours Holder Monitoring, Cardiology Clinic, Refer for Angiogram போன்ற வசதிகளும் காணப்படுகின்றன.
இந்த இருதய நோய் சாய்சாலையில் மாதந்தோறும் சுமார் 400 நோயாளிகள் வருகை தருகின்றனர்.
கடந்த ஆண்டு மட்டும் 3800 இற்கு அதிகமான நோயாளிகள் இந்த இருதயநோய் கிளினிக்கிற்கு வருகை தந்துள்ளனர்.
இது மட்டுமல்லாமல் கல்முனை தொடக்கம் பொத்துவில் வரை, கல்முனை தொடக்கம் வெல்லாவெளி வரை மற்றும் வெளிமாவட்டங்களிலும் இருந்து வரும் நோயாளிகள் இவ்வைத்தியசாலையின் இருதய நோய் சிகிச்சை மூலம் பயன்பெறுவது குறிப்பிடத்தக்கது.
கடந்த மார்கழி மாதம் தொடக்கம் இன்றுவரையில் சுமார் 48 நோயாளிகள் Angiogram பரிந்துரைக்காக வேறு வைத்தியசாலைக்கு அனுப்பி வைக்கப்பட்டுள்ளனர். மேலும்கடந்த ஆண்டு ஒவ்வொரு மாதமும் 100 இற்கு மேற்பட்ட நோயாளிகள் Echo செய்து பார்ப்பதற்காக வருகை தருகின்றனர்.
இவ்வாறு பல்வேறுபட்ட வசதிகளுடன் திகழும் கல்முனை வடக்கு ஆதார வைத்தியசாலையின்
இருதயநோய் சிகிச்சைப்பிரிவு கல்முனை பிரதேசம் மட்டுமல்லாமல் வெளிமாவட்டங்களில் நோயாளிகளுக்கும் தனது மகத்தான மருத்துவ சேவையை வழங்குவது குறிப்பிடத்தக்கது.
புதிதாக நியமனம் பெற்ற இவர் கிரிபெத்ஹொடையை பிறப்பிடமாக கொண்டவர். இவர் வைத்தியத்துறைக்கு 2014.12.02 ஆம் திகதி முதல் நியமனம் பெற்றார். மேலும் தேசிய வைத்தியசாலை இலங்கை சிரேஷ்ட மருத்துவ பதிவாளராகவும் ஸ்ரீ ஜயவர்த்தனபுர போதனா வைத்தியசாலையில் இருதயவியல் துறையின் சிரேஷ்ட பதிவாளராக கடமையாற்றியிருந்தார்.
தற்போது இடமாற்றம் பெற்று கல்முனை ஆதார வைத்தியசாலையில் இருதய நோய் நிபுணராக
கடமையேற்றுள்ளார். இவர் ஓர் சிறந்த இருதயநோய் நிபுணராவார். இவரது சேவையுடன் இப் பிரிவு பொது மக்களுக்கான வைத்திய சேவைகள் மேலும் சிறப்பாக மிளிரும் என்பது நம்பிக்கை.
வி.ரி.சகாதேவராஜா...
(காரைதீவு குறூப் நிருபர்)
Add new comment