கஞ்சிகுடியாறு குளத்தில் விடப்படும் ஒன்றரை இலட்சம் மீன்குஞ்சுகள் | தினகரன்

கஞ்சிகுடியாறு குளத்தில் விடப்படும் ஒன்றரை இலட்சம் மீன்குஞ்சுகள்

அமெரிக்க 'அன்புநெறி' அனுசரணையுடன் முதல் கட்ட பணி ஆரம்பம்

திருக்கோவில் பிரதேசத்திற்குட்பட்ட பாரிய நீர்ப்பாசனக் குளமான கஞ்சிகுடியாறு குளத்தில் ஒரு இலட்சத்து 50ஆயிரம் திலாப்பியா( செல்வன்) மீன்குஞ்சுகளை விடும் திட்டம் நேற்றுமுன்தினம் செவ்வாய்க்கிழமை ஆரம்பித்து வைக்கப்பட்டது. அதனூடாக அப்பிரதேசத்திலிருக்கக் கூடிய பின்தங்கிய கிராமங்களின் மீனவக் குடும்பங்களுக்கான புதிய வாழ்வாதாரத் திட்டம் அங்குரார்ப்பணம் செய்து வைக்கப்பட்டது.

ஐக்கியஅமெரிக்காவின் ‘அன்புநெறி’ அமைப்பின் அனுசரணையுடன் ஐ.எம்.எச்.ஓ அமைப்பின் பரிந்துரைக்கமைவாக் ‘அசிஸ்ற் ஆர்.ஆர்’ அமைப்பு இவ்வேலைத் திட்டத்தை அமுல்படுத்துகிறது. இதற்கு கிழக்கு மாகாண மீன்பிடித்துறை பணிப்பாளர் சிவ.சுதாகரனின் உதவியும் பெறப்பட்டுள்ளது.

முதற்கட்டமாக நேற்றுமுன்தினம் 50ஆயிரம் திலாப்பியா மீன்குஞ்சுகள் குளத்தில் விடப்பட்டன. அடுத்த 6மாதங்களில் அடுத்தகட்ட 50ஆயிரம் மீன்குஞ்சுகளும் அடுத்த 6மாதங்களில் இறுதி 50ஆயிரம் மீன்குஞ்சுகளும் விடப்படவிருக்கின்றன.

இத்திட்டத்தின் அங்குரார்ப்பண நிகழ்வு நேற்றுமுன்தினம் திருக்கோயில் பிரதேச செயலாளர் த.கஜேந்திரன் தலைமையில் நடைபெற்றது. நிகழ்வில் அசிஸ்ற் ஆர்.ஆர் அமைப்பின் இலங்கைக்கான தலைவர் எந்திரி ஹென்றிஅமல்ராஜ் பிரதான அதிதியாகக் கலந்து கொணடார்.

மேலும் உதவி பிரதேச செயலாளர் க.சதிசேகரன், கஞ்சிகுடியாறு மற்றும் தங்கவேலாயுதபுரம் கிராமங்களின் கிராம சேவை உத்தியோகத்தர்கள் அபிவிருத்தி உத்தியோகத்தர்கள், நன்னீர் மீன் வளர்ப்பு மாகாண மற்றும் தேசிய உத்தியோகத்தர்கள். தாண்டியடி மக்கள் சேவைகள் ஒன்றியத்தின் இளைஞர்கள், கஞ்சிகுடியாறு மீனவர் சங்க உறுப்பினர்கள் கலந்து கொண்டனர்.

ஐ.எம்.எச்.ஓ அமைப்பின் தலைவர் வைத்திய கலாநிதி திருமதி ராஜம் இத்திட்டத்தை மேலும் விஸ்தரிக்க உத்தேசித்துள்ள விடயமும் இங்கு தலைவர் ஹென்றியினால் கூறப்பட்டது.

125,000.00 ரூபா பெறுமதியான இந்த மீன்குஞ்சுகள் மட்டக்களப்பு மீனவர் கூட்டுறவுத் திணைக்களத்தின் மீன்குஞ்சு வளர்ப்பு நிலையத்தில் 80 நாட்கள் வளர்க்கப்பட்டு சுமார் 2 தொடக்கம் 3 சென்டிமீட்டர் அளவு வளர்ச்சி அடைந்த நிலையில் இக்குளத்தில் விடப்பட்டுள்ளன. இந்த மீன்குஞ்சுகள் மூன்று மாதத்தின் பின்பு அறுவடை செய்யக் கூடிய அளவு வளர்ந்திருக்கும்.

இத்திட்டத்தின் ஊடாக கஞ்சிகுடியாறு மீனவர் சங்கத்தின் 84 உறுப்பினர்களும் மீன் வியாபாரிகளும் நேரடியாக பயனடைவர்.மறைமுகமாக 350 குடும்பங்களும் மேலும் பல மீன் வியாபாரிகளும் சுமார் 500 வாடிக்கையாளர்களும் பயனடைகின்றனர்.

மீன்குஞ்சுகள் விடப்பட்டதன் பின்னர் கஞ்சிகுடியாறு மீனவர் சங்கக் கட்டடத்தில் பிரதேச செயலாளர் மற்றும் முக்கியஸ்தர்கள், நன்னீர் மீன் வளர்ப்பு உத்தியோகத்தர்கள் ஆகியோருடன் நடைபெற்ற கலந்துரையாடலில் சில முக்கிய முடிவுகள் எடுக்கப்பட்டன.

1. ரூபஷ், சாகாமம், விழாவட்டவான் போன்ற குளங்களுக்கும் மீன்குஞ்சு வழங்குகின்ற திட்டத்தை விரிவுபடுத்துதல்.

2. மீன்குஞ்சு வழங்குகின்ற திட்டத்துடன் இதனை நிறைவு செய்யாமல் தொடர்ந்து இந்த மீனவர் சங்கங்களை வலுவூட்டுதல் செயற்பாடுகளில் கூடுதல் கவனம் செலுத்துதல்.

3. சிறிய நீர்த்தடாகங்களை உருவாக்கி அவற்றில் நன்னீர் மீன் வளர்ப்பு திட்டத்தை மேற்கொள்வதற்கு மானிய அடிப்படையில் உதவி செய்தல். இதற்கு தேவையான அனைத்து தொழில்நுட்ப உதவிகளும் மீனவர் கூட்டுறவு திணைக்களம் மூலமாக வழங்கப்படும்.

4. தற்போது குளங்களில் இருந்து அறுவடை செய்யப்படுகின்ற மீன்கள் நேரடியாக வியாபாரிகளுக்கு விற்பனை செய்யப்படுவதன் காரணமாக வியாபாரிகள் அதிக இலாபம் அடைகிறார்கள். எனவே நேரடியாக மீன்பிடியில் ஈடுபடுகின்ற மீனவர்களுக்கு அதிக இலாபத்தைப் பெற்றுக் கொள்கின்ற வகையில் மீன்களுக்கான பெறுமதி சேர் திட்டத்தை உருவாக்குதல்.

5. புகை கருவாட்டுக்கு அதிக கேள்வி நிலவுவதால் மீனை பதப்படுத்தி கருவாடு உற்பத்தியை மேற்கொள்வதில் விசேட கவனம் செலுத்துதல்.

6. ஒரே நாளில் மீனை கருவாடாக பதப்படுத்துவதற்காக சாகாமம் மீனவர் சங்கத்திற்கு வழங்கப்பட்ட மீன் காயவைக்கும் இயந்திரத்தை உடனடியாக பாவனைக்கு கொண்டு வருகின்ற வகையில் ஒரு நிதியை உருவாக்கி மீனவர்களுக்கு அதிக இலாபத்தை பெற்றுக் கொடுத்தல்.

7. சாகாமம் மீனவர் சங்கத்தால் மீன் காய வைக்கும் இயந்திரம் பயன்படுத்த முடியாத நிலை ஏற்படுகின்ற போது, அதனை கஞ்சிகுடியாறு மீனவர் சங்கத்துக்கு வழங்குவதற்குத் தேவையான ஒழுங்குகளை பிரதேச செயலாளர் துரித நடவடிக்கை மேற்கொள்வார்.

8. வியாபாரிகளுக்கு மீன்களை வழங்குவதற்கு பதிலாக மீனவர் சங்கம் நேரடியாக மீன்களைக் கொள்வனவு செய்து விற்பனை செய்கின்ற திட்டத்தை உருவாக்குவதற்கு தேவையான நடைமுறைகளை மேற்கொள்தல்.

9. குளங்களில் அதிக முதலைகள் இருப்பதால் அடிக்கடி மீன் வலைகள் பாதிப்புக்குள்ளாகும் நிலையில் மீனவர்கள் உடனடியாக தங்களுக்கு தேவையான வலைகளை கொள்முதல் செய்து தொழிலை மேற்கொள்வற்கான அவசர கடன் திட்டத்தை அறிமுகப்படுத்துதல். (மீனவ சங்கத்திற்குள் அதிக நிதியை கையாளுகின்ற வகையில் சிறந்த பொறிமுறை ஒன்றை உருவாக்குதல்)

10. நன்னீர் மீன்பிடி ஊடாக கிராமத்திற்குள் இருக்கின்ற ஏனைய நபர்களுக்கு புதிய தொழில் வாய்ப்புக்களை உருவாக்குதல்.

11. நீண்ட காலமாக குறிப்பிட்ட சிலர் மாத்திரமே மீன்பிடியில் ஈடுபடுகின்ற அதேவேளை கிராமத்துக்குள் நீண்ட காலமாக இருக்கின்றவர்களுக்கு மீன்பிடிப்பதற்கான அனுமதியை வழங்குகின்ற வகையில் புதிய அணுகுமுறை ஒன்றை உருவாக்குதல்.

12. மீனவ சங்கத்தால் சேமிக்கப்படுகின்ற நிதியிலிருந்து ஏனைய தொழில் வாய்ப்புகளையும் உருவாக்குதல்.

13. மீன்பிடியும் விவசாயமும் ஒன்றாக மேற்கொள்கின்ற இப்பிரதேசத்தில் விவசாயத்துக்கும் கூடுதல் முக்கியத்துவம் வழங்குதல்.

14. தற்போது யானைவேலி அமைக்கப்பட்டு கொண்டிருப்பதால் மகா மற்றும் யால ஆகிய இரண்டு போகங்களும் மேட்டுநில பயிர்ச்செய்கை மேற்கொள்ளுகின்ற வகையில் புதிய தொழில்நுட்பம் மற்றும் புதிய பயிர்ச்செய்கை திட்டங்களை மேற்கொள்தல்

15. திருக்கோயில் பிரதேசத்திலே விவசாயத்தில் புதிய தொழில்நுட்பங்கள் மற்றும் புதிய வகை பயிர்ச்செய்கையை மேற்கொள்வதற்காக மட்டக்களப்பு சோலை விவசாய அமைப்பை இப்பிரதேசத்திற்குள் பணியாற்றுவதற்கு அழைத்தல்.

அங்கு கலந்துரையாடி எடுக்கப்பட்ட முடிவுகளுக்கு செயல் வடிவம் கொடுப்பதற்கான கலந்துரையாடல் ஒன்றை வருகின்ற வாரங்களில் பிரதேச செயலாளர் தலைமையிலே கூடி தீர்க்கமான சில முடிவுகளை எடுப்பதாக தீர்மானிக்கப்பட்டது.

-வி.ரி.சகாதேவராஜா
(காரைதீவு குறூப் நிருபர்)


Add new comment

Or log in with...