விழிப்புலனற்றோருக்கு வழித்துணையாக நவீன தொழில்நுட்ப வெள்ளைப் பிரம்பு | தினகரன்

விழிப்புலனற்றோருக்கு வழித்துணையாக நவீன தொழில்நுட்ப வெள்ளைப் பிரம்பு

கல்முனை கல்வி வலயத்திற்குட்பட்ட மருதமுனை அல்-மனார் மத்திய கல்லூரியில் தரம்12 இல் விஞ்ஞானப் பிரிவில் கல்வி கற்று வரும் எம்.ரி.முகம்மட் ஜினான் என்ற மாணவன், கண் பார்வையற்றோர் பயன்படுத்தும் வெள்ளைப்பிரம்புக்குப் பதிலாக நவீன ஸ்மாட் டிஜிட்டல் தெழில்நுட்பத்துடனான(smart digital test white cane) புதிய வெள்ளைப் பிரம்பை கண்டுபிடித்து சாதனை புரிந்துள்ளார்.

விழிப்புலனற்றவர்கள் அல்லது பாரிய பார்வைக் குறைபாடு உள்ளவர்கள் பயன்படுத்தும் ஒரு சாதனமாக வெள்ளைப் பிரம்பு (white cane) விளங்குகின்றது. விழிப்புலனற்றவர்களின் ஒளிவிளக்காகவும், ஊன்றுகோலாகவும், அடையாளச் சின்னமாகவும் வெள்ளைப் பிரம்பு உள்ளது. பிறிஸ்ரலைச் சேர்ந்த ஜேம்ஸ் பிக்ஸ் என்பவரால் 1921ஆம் ஆண்டு வெள்ளைப் பிரம்பு கண்டு பிடிக்கப்பட்டது.

ஒரு விபத்தினால் பார்வையை இழந்த ஜேம்ஸ் பிக்ஸ் வீதியில் செல்லும் வாகனங்களில் இருந்து தன்னைப் பாதுகாப்பதற்கு வெள்ளை நிறம் பூசப்பட்ட தடியைப் பயன்படுத்திக் கொண்டாராம். பத்து வருடங்களின் பின்பு வெள்ளைப் பிரம்புப் பாவனை உறுதிப்படுத்தப்பட்டது. 1964ஆம் ஆண்டிலிருந்து வருடா வருடம் ஒக்டோபர் 15ம் திகதி சர்வதேச ரீதியில் வெண்பிரம்பு பாதுகாப்பு நாளாகக் கடைப்பிடிக்கப்பட்டு வருகின்றது.

இன்று விழிப்புலனற்றோர் அல்லது பார்வைக் குறைபாடு உள்ளவர்களால் பயன்படுத்தப்படுவதற்கு ஏராளமான உபகரணங்கள் பயன்பாட்டில் உள்ளன. உருப்பெருத்தல் செய்யும் மென்பொருட்கள், கணினித் திரையக வாசிப்பான்கள் (Computer Scree Readers), பெரிய நிறமுள்ள எழுத்துக்கள் கொண்ட தொலைபேசிகள், விசேடமாக வடிவமைக்கப்பட்ட கைத்தொலைபேசிகள் எனப் பல்வேறு உபகரணங்கள் பயன்பாட்டில் உள்ளன.

"நான் தயாரித்துள்ள வெள்ளைப் பிரம்பு பல நவீன தொழில்நுட்ப வசதிகளை கொண்டுள்ளது. இது போன்ற ஒன்றை இலங்கையில் மாத்திரமல்ல உலகிலும் எவரும் கண்டுபிடிக்கவில்லை. இறுதியாக உலகளாவில் கண்டுபிடிக்கப்பட்டு பயன்படுத்தப்படும் வெள்ளைப் பிரம்பானது வீதியைக் கடக்க ஒளியை வெளியிடும் சென்சர் மாத்திரம் பயன்படுத்தப்பட்டுள்ள வெள்ளைப் பிரம்பாகும். ஆனால் நான் தயாரித்துள்ள வெள்ளைப்பிரம்பில், Alert deductions அதாவது - முன்னாலுள்ள பொருளைத் தட்டி உணரத் தேவையில்லை ஒலி எழுப்பும் அமைப்பு உள்ளது. இரவுநேரத்திலும் வீதியைக் கடக்க உதவும் LEDசென்ஸர் லைட் உள்ளது. இது வாகன ஓட்டுனர்களுக்கும் விளங்கும். கண் தெரியாதவருக்கு காது கேட்காமல் இருந்தால் ஒலியதிர்வு கைப்பிடியில் உள்ளது. smoke deductions - என்ற நச்சு வாயுத் தாக்கத்தை உணரும் ஒலி எழுப்பும் சென்ஸர் உள்ளது. Bluetooth deductions என்ற - வீட்டிற்குள்ளிருந்து இன்னொருவர் இயக்கும் வண்ணம் Bluetooth வசதியும் உண்டு" என்றார் மாணவன் எம்.ரி.முகம்மட் ஜினான்.

அவை அனைத்தையும் அவர் செயற்படுத்தியும் காட்டுகிறார்.

"விடாமுயற்சி, நம்பிக்கை இருந்தால் எதனையும் சாதிக்கலாம். இன்னும் இதனை நவீனமயப்படுத்த முடியும். ஒன்லைன் ஊடாகவே அனைத்து சென்சர்களையும் கொள்வனவு செய்து கணணிமயப்படுத்தி ஒரு சிறிய சிப்பில் (Memory) வைத்துள்ளேன்" என்கிறார் அவர்.

கல்லூரியின் அதிபர் பி.எம்.பதுறுத்தீன் -இது குறித்து கருத்துத் தெரிவிக்கும் போது, "எமது பாடசாலை மாணவன் முகம்மட் ஜினானை பாடசாலை சமூகம் பாராட்டுகிறது. இவரது கண்டுபிடிப்பு ஊடாக இன்று மருதமுனை அல்-மனார் மத்திய கல்லூரியின் பெயர் பெருமை பேசப்படும் அளவிற்கு மாறியுள்ளது. இவருக்கு கற்பிக்கும் ஆசிரியர்கள் மற்றும் இவரது பெற்றோருக்கு நன்றி தெரிவிக்கிறேன். இலங்கையின் இளம் விஞ்ஞானிகளுக்கான அங்கீகாரத்தை இந்த மாணவனுக்கு பெற்றுக் கொடுத்து இவரை மேலும் உயர்த்த வேண்டும்" என்றார்.கல்லூரியின் பிரதி அதிபர் - ஏ.முஹம்மட் அன்சார் கருத்துத் தெரிவிக்ைகயில், "மாணவன் ஜினான் கையடக்கத் தொலைபேசியை சமூக பயன்பாட்டிற்காக முறையாகப் பயன்படுத்தி YouTube ஊடாக பல்வேறு தகவல்களைப் பெற்று சமூகத்தில் நலிவுற்றவர்களுக்காக இந்த நவீன வெள்ளைப் பிரம்பை கண்டுபிடித்துள்ளார். மாணவர்களை வளப்படுத்தினால் எதனையும் சாதிக்கலாம் என்பதற்கு இந்த மாணவன் நல்லதொரு உதாரணம்" என்றார்.உலகத்தில் சுமார் 314 மில்லியன் மக்கள் பாரதூரமான பார்வைக் குறைபாடு உள்ளவர்களாகவும், 37 மில்லியன் மக்கள் முற்றாகப் பார்வையிழந்தவர்களாகவும் இருப்பதாகத் தகவல்கள் தெரிவிக்கின்றன.

மருதமுனை அல்-மனார் மத்திய கல்லூரி மாணவன் எம்.ரி.முகம்மட் ஜினானின் இந்தக் கண்டுபிடிப்பு பார்வையற்றோருக்கு சிறந்த உதவியாக அமையும் என்பது நிட்சயம்.

 


Add new comment

Or log in with...