கடும் வரட்சியினால் பாதிக்கப்பட்ட சுமார் 4,22,000 பேருக்கு உலர் உணவு | தினகரன்

கடும் வரட்சியினால் பாதிக்கப்பட்ட சுமார் 4,22,000 பேருக்கு உலர் உணவு

வரட்சியினால் பாதிக்கப்பட்டுள்ள சுமார் 4,22,000 மக்களுக்கு உலர் உணவு பொருட்களை வழங்குவதற்காக அரசாங்கம் 9,000 மில்லியன் ரூபாவை ஒதுக்கியுள்ளதென ஜனாதிபதி மைத்திரிபால சிறிசேன தெரிவித்தார்.

இந்த நிவாரண உதவி நடவடிக்கைகள் இந்த வாரம் முதல் ஆரம்பிக்கப்பட்டுள்ளதாகவும் ஜனாதிபதி மேலும் குறிப்பிட்டார். எல்லங்கா நீர்ப்பாசன புனரமைப்பு திட்டத்தின் கீழ் அநுராதபுரம் மஹவிலச்சிய நபடகஸ்திகிலிய குள புனரமைப்பு பணி நேற்று (21) முற்பகல் ஆரம்பித்து வைக்கப்பட்டது. இந்த நிகழ்வில் கலந்துகொண்டு உரையாற்றும்போதே ஜனாதிபதி இதனைத் தெரிவித்தார்.

காலநிலை மாற்றத்தின் காரணமாக மிக மோசமாக பாதிக்கப்பட்டுள்ள நாடுகளில் இலங்கை நான்காவது இடத்தில் இருப்பதாக புதிய அறிக்கைகள் தெரிவிக்கின்றன எனக் குறிப்பிட்ட ஜனாதிபதி, இந்த நிலைமைக்கு முகம்கொடுப்பதற்கும் பாதிக்கப்பட்ட மக்களுக்கு நிவாரணம் வழங்குவதற்கும் அரசாங்கம் முழுமையாக நடவடிக்கை எடுத்து வருவதாகவும் தெரிவித்தார்.

வரட்சி நிவாரண நிகழ்ச்சித்திட்டம் தொடர்பாக கருத்து தெரிவித்த ஜனாதிபதி, 2012ஆம் ஆண்டு வட மத்திய மாகாணத்தில் ஏற்பட்ட வரட்சியின்போது அப்போது ஆட்சியில் இருந்த அரசாங்கம் மக்களுக்கு பல்வேறு உறுதிமொழிகளை வழங்கி பத்திரிகைகளில் பக்கம் பக்கமாக விளம்பரங்களை பிரசுரித்தபோதும் அம்மக்களுக்கு எவ்வித நிவாரணத்தையும் வழங்கவில்லை எனத் தெரிவித்தார்.

கடந்த 2016, -2017ஆம் ஆண்டுகளில் நாடளாவிய ரீதியில் ஏற்பட்ட வரட்சியினால் பாதிக்கப்பட்ட மக்களுக்கு நிவாரணம் வழங்குவதற்காக தற்போதைய அரசாங்கம் 15,000 மில்லியனுக்கும் அதிகமான நிதியை செலவிட்டுள்ளதை இதன்போது ஜனாதிபதி நினைவுகூர்ந்தார்.

காலநிலை மாற்றத்திற்கு முகங்கொடுப்பதற்கு இந்த குறுங்கால தீர்வை போன்று நீண்டகால தீர்வும் அவசியமாகுமெனக் குறிப்பிட்ட ஜனாதிபதி, இதற்காகத்தான் அரசாங்கம் நாடளாவிய ரீதியில் குளங்களை புனரமைக்கும் பணியை ஆரம்பித்திருப்பதாக தெரிவித்தார்.

கஹட்டகஸ்திகிலிய மற்றும் கலென்பிந்துனுவெவ பிரதேசங்களில் வரட்சிக்கு முகங்கொடுத்துள்ள குடும்பங்களில் ஒரு இளம் தம்பதியினர் பல தடவைகள் உண்பதற்கு உணவின்றி முருங்கை கீரைகளை அவித்து உண்பதாக தெரிவிக்கப்பட்ட ஊடகச் செய்தி குறித்து கருத்து தெரிவித்த ஜனாதிபதி, இதுபற்றி கண்டறிவதற்காக உடனடியாக அதிகாரி ஒருவரை அனுப்பி வைத்துள்ளதாகத் தெரிவித்தார்.

இவ்வாறானதொரு நிலைமை ஏற்பட்டிருந்தால் அதற்கு மாவட்டத்தில் உள்ள மக்கள் பிரதிநிதிகளும் அரசாங்க அதிகாரிகளும் பொறுப்புக்கூற வேண்டுமெனக் குறிப்பிட்ட ஜனாதிபதி, பாதிக்கப்பட்ட மக்களிடம் சென்று அவர்களது குறைகளை கண்டறிய வேண்டியது மக்கள் பிரதிநிதிகளினதும் அரசாங்க அதிகாரிகள் அனைவரினதும் பொறுப்பாகுமெனத் தெரிவித்தார்.

ஜனாதிபதி மைத்திரிபால சிறிசேனவின் பணிப்புரையின் பேரில் நடைமுறைப்படுத்தப்படும் எல்லங்கா நீர்ப்பாசன புனரமைப்பு திட்டத்தின் கீழ் அனுராதபுரம் மாவட்டத்தில் உள்ள குளங்களை புனரமைக்கும் பணிகள் நேற்று ஆரம்பித்து வைக்கப்பட்டன.

இதன் முதற்கட்டமாக மஹவிலச்சிய மற்றும் நொச்சியாகம பிரதேச செயலாளர் பிரிவுகளிலுள்ள 17 குளங்கள் புனரமைப்பிற்காக தெரிவுசெய்யப்பட்டுள்ளன. புனரமைப்பு செய்யப்படும் ஒவ்வொரு குளத்தையும் அண்மித்ததாக அப்பிரதேசத்தில் வாழும் மக்களின் வாழ்க்கைத்தரத்தை மேம்படுத்துவதற்காகவும் பல்வேறு செயற்பாடுகள் ஆரம்பிக்கப்படவுள்ளதுடன், இதன் கீழ் விவசாய நடவடிக்கைகள், மீன்பிடி, சுற்றுலா கைத்தொழில், பெறுமதி சேர்க்கப்பட்ட உற்பத்தி மேம்பாடுகள், சமூக அபிவிருத்தி நடவடிக்கைகளுடன் தொடர்புடைய திட்டங்களும் நடைமுறைப்படுத்தப்படவுள்ளன.

2,400 குளங்களை புனரமைக்கும் தேசிய நிகழ்ச்சித் திட்டத்தின் கீழ் மேற்கொள்ளப்படும் இந்த நடவடிக்கைகள் இலங்கையின் பல மாகாணங்களில் முன்னெடுக்கப்பட்டு வருவதுடன், இதன் கீழ் முன்னெடுக்கப்பட்டுள்ள குளங்களின் புனரமைப்பு பணிகள் இலங்கை இராணுவத்தின் பொறியியற் பிரிவினரால் மேற்கொள்ளப்பட்டு வருகின்றன.

இந்த நிகழ்ச்சித் திட்டத்தின் கீழ் மஹவிலச்சிய பிரதேச செயலாளர் பிரிவிலுள்ள நபடகஸ்திகிலிய, ஹெலம்ப குளம், மஹ மில்லகொல்லேவ, இஹல மில்லகொல்லேவ, இஹல ஹெளம்ப கலஹிடியாவ, துணுமடலாவ, இஹல எத்தாவெவ குளம் ஆகிய குளங்களும் நொச்சியாகம பிரதேச செயலாளர் பிரிவிலுள்ள இஹல கல்கிரியாகம, திவுல்வெவ, பஹல கல்கிரியாகம, சியம்பலாகெடிய, இஹல கோங்கஸ்திகிலிய, லேனவெவ, நயிவெவ, எலபத்கம வெவ ஆகிய குளங்கள் புனரமைக்கப்படவுள்ளன.

மன்னர் காலம் முதல் உன்னத நீர்ப்பாசன பொறியியல் எண்ணக்கருவாக கருதப்படும் எல்லங்கா முறைமையின் மூலம் கிராமிய குள கட்டமைப்பில் அதிகளவு நீரை தேக்கி வைப்பதற்காக இந்த குளங்களின் புனரமைப்புப் பணிகள் மேற்கொள்ளப்படவுள்ளன.

இதன்மூலம் தற்போது ரஜரட்ட பிரதேசத்தில் ஏற்பட்டுள்ள பாரிய குடிநீர் மற்றும் நீர்ப்பாசன வசதிகளின் பற்றாக்குறையை நிரந்தரமாக தீர்த்து வைக்க எதிர்பார்க்கப்படுகின்றது.

சுற்றாடலின் சமநிலையை பாதுகாத்தல், நிலக்கீழ் நீர்மட்டத்தை அதிகரித்தல், விவசாயத்துறையின் உற்பத்திகளை அதிகரித்தல், நன்னீர் மீன்பிடி கைத்தொழில் விருத்தி, கிராமிய மட்டத்தில் சுற்றுலா கைத்தொழிலுடன் தொடர்புடைய வாழ்வாதார வழிகளை ஏற்படுத்துவதும் இதன்மூலம் எதிர்பார்க்கப்படும் ஏனைய நோக்கங்களாகும்.

மக்களினதும் வனஜீவராசிகளினதும் நீர் மற்றும் உணவுத் தேவையை நிறைவேற்றுதல், இப் பிரதேசங்களிலுள்ள மக்களின் வாழ்க்கைத் தரத்தை மேம்படுத்துதல், வறுமையை ஒழித்தல், மக்களுக்கும் வனவிலங்குகளுக்குமிடையிலான மோதல்களை குறைத்தல், மொத்த தேசிய உற்பத்தியை அதிகரித்தல், நாட்டில் மேற்கொள்ளப்படும் அனைத்து நீர்ப்பாசன புனரமைப்பு பணிகளையும் உரிய அபிவிருத்தி இலக்கை நோக்கி வழிப்படுத்தல் என்பன இதனூடாக எதிர்பார்க்கப்படும் ஏனைய நன்மைகளாகும்.

நேற்று சுபவேளையில் மண்ணை வெட்டி மஹவிலச்சிய நபடகஸ்திகிலிய குளத்தின் புனரமைப்பு பணிகளை ஜனாதிபதி ஆரம்பித்து வைத்தார்.

மகாவலி வலயங்களில் உள்ள மக்களுக்கு ஒரு இலட்சம் காணி உறுதிகளை வழங்கும் நிகழ்ச்சித்திட்டத்தின் கீழ் அனுராதபுர மாவட்டத்தில் உள்ள மக்களுக்கு 2,500 காணி உறுதிகளை வழங்குவதை குறிக்கும் முகமாக ஜனாதிபதியினால்காணி உறுதிகள் வழங்கப்பட்டன.

மேலும் களை வெட்டும் இயந்திரங்களும் வழங்கப்பட்டன.

அமைச்சர்களான துமிந்த திசாநாயக்க, பி.ஹெரிசன், சந்ராணி பண்டார, இராஜாங்க அமைச்சர் வீரகுமார திசாநாயக்க, பிரதி அமைச்சர் அஜித் மான்னபெரும, முன்னாள் அமைச்சர் திஸ்ஸ கரலியத்த, சாந்த பண்டார ஆகியோர் உள்ளிட்ட பிரதேச மக்கள் பிரதிநிதிகளும் ஜனாதிபதியின் செயலாளர் உதய ஆர். செனவிரத்ன, மகாவலி அபிவிருத்தி, சுற்றாடல் துறை அமைச்சின் செயலாளர் அநுர திசாநாயக்க, மகாவலி பணிப்பாளர் நாயகம் சரத் சந்ரசிறி வித்தான, அனுராதபுர மாவட்ட செயலாளர் பீ.எம்.வன்னிநாயக்க உள்ளிட்ட அதிகாரிகளும் இந்நிகழ்வில் கலந்துகொண்டனர்.


Add new comment

Or log in with...