அல் ஜசீரா ஆட்ட நிர்ணய ஆவணப்படம்; விசாரணைக்கு ஓத்துழைப்பு | தினகரன்

அல் ஜசீரா ஆட்ட நிர்ணய ஆவணப்படம்; விசாரணைக்கு ஓத்துழைப்பு

 

வெளியாகி இருக்கும் ஆட்ட நிர்ணய விவகாரம் தொடர்பில் எந்த ஒரு விசாரணைக்கும் ஒத்துழைப்பு அளிக்க தயாராக இருப்பதாக இலங்கை கிரிக்கெட் சபை அறிவித்துள்ளது.  

அவுஸ்திரேலியா மற்றும் இங்கிலாந்து போன்ற அணிகள் பங்கேற்கும் டெஸ்ட் போட்டிகளுக்கு மாற்று ஆடுகளம் ஒன்றை தயாரிக்க காலி மைதானப் பராமரிப்பாளர்கள் இலஞ்சம் பெற்றதாக அல் − ஜசிரா தொலைக்காட்சி வெளியிட்ட ஆவணப் படம் ஒன்றில் குற்றம் சாட்டப்பட்டுள்ளது.  

இது பற்றி சர்வதேச கிரிக்கெட் கவுன்ஸில் ஏற்கனவே விசாரணைகளை ஆரம்பித்துள்ளது. இந்த ஆவணம் பற்றி அவதானம் செலுத்தி இருப்பதாக குறிப்பிட்டிருக்கும் இங்கிலாந்து கிரிக்கெட் சபை, ஐ.சி.சிக்கு ஆதரவு அளிப்பதாக தெரிவித்துள்ளது.  

“ஊழல் தொடர்பில் இலங்கை கிரிக்கெட் சபை பொறுமை காக்காது. குற்றம்சாட்டப்படும் சம்பவத்தில் தொடர்புபட்ட எந்த ஒரு நபருக்கு எதிராகவும் குற்றச்சாட்டு நிரூபிக்கப்பட்டால் உடன் நடவடிக்கை எடுக்கப்படும்” என்று இலங்கை கிரிக்கெட் சபை தனது அறிக்கையில் குறிப்பிட்டுள்ளது.  

“இலங்கை கிரிக்கெட் சபை ஐ.சி.சியுடன் தொடர்ந்து ஒத்துழைப்போடு செயற்படுகிறது. எதிர்வரும் இலங்கை சுற்றுப்பயணங்களில் அதன் வழிகாட்டல்களை பின்பற்றி ஊழல் எதிர்ப்பு நடவடிக்கைகளில் ஈடுபடும்” என்று உறுதி அளிக்கப்பட்டுள்ளது.  

இங்கலாந்து அணி வரும் ஒக்டோபர் மற்றும் நவம்பர் மாதங்களில் இலங்கைக்கு சுற்றுப்பயணம் மேற்கொண்டு மூன்று டெஸ்ட், ஐந்து ஒருநாள் மற்றும் ஒரு டி20 போட்டிகளில் ஆடவுள்ளது.  

வெளியாகி இருக்கும் ஆவணப்படத்தில், காலி மைதானத்தின் உதவி முகாமையாளரும், பராமரிப்பாளருமான தரங்க இந்திக்க குறித்த போட்டிகளின் முடிவுகளை தங்களுக்கு சாதகமாக ஆக்க துடுப்பாட்ட ஆடுகளத்தை மாற்றி ஆட்ட நிர்ணயக்காரர்களுடன் இணைந்து செயற்பட்டதை அவரது வாயினாலேயே கூறியது பதிவாகி இருப்பதாக தெரிவிக்கப்படுகின்றது. 

அதாவது, 2016 ஆம் ஆண்டு இலங்கை மற்றும் அவுஸ்திரேலிய அணிகளுக்கு இடையிலான டெஸ்ட் போட்டி ஒன்றும் 2017 ஆம் ஆண்டு இலங்கை அணிக்கும் இந்திய அணிக்கும் இடையிலான டெஸ்ட் போட்டி ஒன்றும் காலி மைதானத்தில் இடம்பெற்றிருந்தது. இந்த போட்டிகளில் ஆடுகளத்தின் தன்மையை மாற்றி ஆட்ட நிர்ணயத்தில் ஈடுபடுவதை இந்திக்க ஒப்புக் கொண்டதே அல் ஜசிராவின் இந்த ஆவணப் படத்தில் இருப்பதாக குறிப்பிடப்படுகின்றது. 

இந்திக்க, இந்த ஆவணப்படத்தில் இலங்கையின் இந்திய அணியுடனான டெஸ்ட் போட்டியின் போது ஆடுகளத்தை துடுப்பாட்ட வீரர்களுக்கு ஏற்றவாறு தயார் செய்ததனை ஒப்புக் கொண்டதும், அவுஸ்திரேலிய அணியுடனான போட்டியில் ஆடுகளத்தை பந்து வீச்சாளர்களுக்கு சாதகமாக மாற்றியதை ஒப்புக் கொண்டதும் தெளிவாக பதிவாகி இருப்பதாக தெரிவிக்கப்பட்டுள்ளது. எனினும், இந்த குற்றச் செயலில் எந்தவித கிரிக்கெட் வீரர்களின் பங்களிப்பும் இல்லை எனக் கூறப்படுகின்றது. 

மேலும் இந்த ஆவணப்படத்தில், இலங்கையின் முதல் தர கிரிக்கெட் வீரர் தரிந்து மெண்டிஸ் மற்றும் இந்தியாவின் தொழில்முறை கிரிக்கெட் வீரர் ரொபின் மொர்ரிஸ் ஆகியோர் இந்திக்கவுடன் இணைந்து காலியில் இந்த நவம்பர் மாதம் நடைபெறவிருக்கும் இலங்கை மற்றும் இங்கிலாந்து ஆகிய அணிகளுக்கு இடையிலான போட்டியில் மீண்டும் ஆட்ட நிர்ணயத்தில் ஈடுபட திட்டம் போட்டதும் பதிவாகி இருப்பதாகவும் கூறப்படுகிறது. 

இந்த ஆவணப் படத்தில் ஆடுகளத்தை மாற்றியமைக்கும் இந்த சட்டவிரோத வேலைகளைச் செய்வதற்காக டெஸ்ட் போட்டியொன்றுக்கு 37,000 அமெரிக்க டொலர்களை (இலங்கை நாணயப்படி 58 இலட்ச ரூபாய்) ஆட்ட நிர்ணயக்காரர்கள் மைதான பராமரிப்பாளருக்கு கொடுப்பதாக கூறியதும் இந்த நிர்ணயத்தில் கிடைக்கும் தவறான பணத்தில் 30 சதவீதத்தை ஆட்ட நிர்ணயத்தை ஒழுங்கு செய்தவர்களுக்கு தர வேண்டும் எனக் கூறியதும் பதிவாகி இருப்பதாகவும் கூறப்படுகின்றது. 

இலங்கை கிரிக்கெட் சபை 2017 ஆம் ஆண்டு ஏற்கனவே உள்ளுர் போட்டி ஒன்றில் இடம்பெற்ற ஆட்ட நிர்ணய சதியை விசாரிக்க ஓய்வு பெற்ற நீதிபதியான ரோஹினி மாரசிங்கவை நியமித்த நிலையிலையே இந்த புதிய சர்ச்சை கிளம்பியுள்ளது.

 


Add new comment

Or log in with...