இரு மாதங்களுக்கொருமுறை எரிபொருள் விலை மீளாய்வு | தினகரன்

இரு மாதங்களுக்கொருமுறை எரிபொருள் விலை மீளாய்வு

உலக சந்தை விலைக்ேகற்ப விலைச்சூத்திரம் மாற்றியமைப்பு

எரிபொருள் விலைகள் இரண்டு மாதங்களுக்கொருமுறை மீளாய்வு செய்யப்பட்டு அதன் பிரகாரம் விலைகளில் மாற்றங்கள் ஏற்படுத்தப்படுமென நிதியமைச்சர் மங்கள சமரவீர தெரிவித்துள்ளார்.

நிதியமைச்சில் நேற்று நடைபெற்ற ஊடகவியலாளர் மாநாட்டில் ஊடகவியலாளர் ஒருவரால் எழுப்பப்பட்ட கேள்வியொன்றுக்குப் பதிலளிக்கையிலேயே அமைச்சர் மேற்கண்டவாறு தெரிவித்தார்.

இதுகுறித்து அவர் தொடர்ந்தும் தெளிவுபடுத்துகையில், உலகச் சந்தையில் எரிபொருள் விலையில் ஏற்பட்ட மாற்றத்தின் விளைவாகவே எரிபொருள் விலைச் சூத்திரம் மாற்றியமைக்கப்பட்டுள்ளது. சிங்கப்பூர் எரிபொருள் விலைச் சூத்திரத்தைப் பயன்படுத்தி எரிபொருள் விலைகள் இரண்டு மாதங்களுக்கு ஒருமுறை மீளாய்வு செய்யப்படும். உலகச் சந்தை விலைகளுக்கேற்ப விலைகளில் அதிகரிப்பு அல்லது வீழ்ச்சி காணப்படவே செய்யும். விலை வீழ்ச்சி ஏற்படுமாயின் விலைச் சூத்திரத்தில் அதன் பிரதிபலிப்பு தென்படும்.

அடுத்த வருட முதல் காலாண்டுப் பகுதியில் எரிபொருள் விலைகளில் வீழ்ச்சி ஏற்படவுள்ளது. அதன்படி விலைகளில் வீழ்ச்சி ஏற்படும் எனவும் அவர் குறிப்பிட்டார். புதிய எரிபொருள் விலைச் சூத்திரத்தை அமைச்சரவை அங்கீகரித்ததைத் தொடர்ந்தே அரசாங்கம் அதனை நேற்று நள்ளிரவு முதல் நடைமுறைப்படுத்த தீர்மானித்தது. 92 ஒக்டேன் பெற்றோலின் விலைகள் லீற்றர் ஒன்றுக்கு 117 ரூபாவில் இருந்து 137 ரூபாவாகவும், 95 ஒக்டேன் பெற்றோலின் விலைகள் 128 ரூபாவிலிருந்து 148 ரூபாவாகவும் ஓட்டோ டீசலின் விலைகள் லீற்றர் ஒன்றுக்கு 109 ரூபாவிலிருந்து 119 ரூபாவாகவும் மண்ணெண்ணெய் 44 ரூபாவிலிருந்து 101 ரூபாவாகவும் உயர்த்தப்பட்டுள்ளன.

தெற்காசியாவில் மிகவும் குறைந்த எரிபொருள் விலையைக்கொண்ட நாடுகள் மத்தியில் இலங்கை விளங்கி வருகின்றதென தெரிவித்த அமைச்சர் சமரவீர, நேபாளத்தில் ஒரு லீற்றர் 92 ஒக்டேன் பெற்றோலின் விலையானது இலங்கை ரூபாவில் 149 ஆகவும், பங்களாதேஷில் 159 ஆகவும், இந்தியாவில் 169 ஆகவும் காணப்படுவதாக குறிப்பிட்டார்.

ஒரு லீற்றர் மண்ணெண்ணெயின் விலையும் 57 ரூபாவினால் அதிகரிக்கும் வகையில், 44 ரூபாவிலிருந்து 101 ரூபாவாக மீளாய்வு செய்யப்பட்டுள்ளது. எவ்வாறிருப்பினும், மண்ணெண்ணெயைப் பெற்றோலுடன் சாரதிகள் சிலர் கலப்படம் செய்ததன் விளைவே குறித்த விலை அதிகரிப்புக்கான உண்மையான காரணமென அமைச்சர் ராஜித சேனாரத்ன தெரிவித்துள்ளார்.

மீனவ சமூகத்தவருக்கும் அதே விலையில் தான் மண்ணெண்ணெய் விற்பனை செய்யப்படவுள்ளதாகவும் அமைச்சர் மேலும் தெரிவித்தார். 

 


Add new comment

Or log in with...