இனமுறுகலை எண்ணெய் ஊற்றி சுவாலையாக்கிய சமூகவலைத்தளங்கள் | தினகரன்

இனமுறுகலை எண்ணெய் ஊற்றி சுவாலையாக்கிய சமூகவலைத்தளங்கள்

கண்டி மாகாணத்தின் மத்திய பகுதி ஒன்றில் பெரும்பான்மை சிங்கள பெளத்த மக்களுக்கும், சிறுபான்மை முஸ்லிம் மக்களுக்கும் இடையே எற்பட்ட மோதலை அடுத்து, கடந்த 6-ஆம் திகதி அங்கு அவசர நிலை பிறப்பிக்கப்பட்டது.

இதனை அங்குள்ள எதிர்க்கட்சிகள் கடுமையாக எதிர்த்துள்ளன. ஜனாதிபதி மைத்திரிபால சிறிசேனவும், பிரதமர் ரணில் விக்கிரமசிங்கவும், கலவரத்தை சரியான முறையில் கையாள தவறிவிட்டனர் என்று எதிர்க்கட்சிகள் தாக்கி உள்ளன.

இலங்கைக்கு அவசரநிலை ஒன்றும் புதிதல்ல. தொடர்ச்சியாக இல்லாவிட்டாலும், 1971-_ 2011 ஆகிய ஆண்டுகளுக்கு இடையிலான காலகட்டத்தில், பெரும்பான்மையான சமயங்களில் அங்கு அவசர நிலை இருந்துள்ளது.

2011ஆம் ஆண்டுதான் அவசர நிலை தளர்த்தப்பட்டது. அதன்பின்னர் இப்போதுதான் முதல்முறையாக அங்கு அவசர நிலை பிறப்பிக்கப்பட்டுள்ளது.

தமிழீழ விடுதலை புலிகள் அமைப்பு, தனிநாடு கேட்டு இலங்கையில் போராடி வந்தது. இதற்கு எதிரான உள்நாட்டுப் போர் வெடித்தது. 1983 - ஆம் ஆண்டுக்கு பின்பான அவசர நிலைக்கு இதுதான் காரணம்.

கடந்த 4 ஆம் திகதி இலங்கையில் வன்முறை ஆரம்பித்தது. இதன் தொடர்ச்சியாக சில பள்ளிவாசல்கள், வீடுகள் சேதமாக்கப்பட்டன். இந்த கலவரத்தில் இருவர் இறந்தனர். இதன் காரணமாக அங்கு 6- ஆம் திகதி ஜனாதிபதி மைத்திரிபால சிறிசேன பத்து நாட்களுக்கு அவசர நிலையை பிறப்பித்தார்.

கண்டியில் முஸ்லிம்களின் கடைகள், வீடுகள் தாக்கப்பட்டதை தொடர்ந்து அங்கு ஊரடங்கு உத்தரவு போடப்பட்டது.மோதல் தொடர்வதை அடுத்து, அந்தப் பகுதியில் 7ம் திகதி (புதன்கிழமை) மீண்டும் ஊரடங்கு உத்தரவு போடப்பட்டது. அதுமட்டுமல்லாமல், சமூக ஊடகங்களும், வட்ஸ் அப் சேவையும் முடக்கப்பட்டன.

எதனால் இது ஏற்பட்டது?

சிங்கள குடிமகன் ஒருவர் கடந்த வாரம் மரணமடைந்தார். முஸ்லிம்களால் தாக்கப்பட்டு அவர் இறந்தார் என்று கூறப்பட்டதை அடுத்து கண்டியில் மார்ச் 4ம் திகதி வன்முறை வெடித்தது.

இந்த சம்பவத்தைத் தொடர்ந்து முஸ்லிம்களையும், அவர்களது வீடுகள், கடைகளையும் வன்முறைக் கும்பல் தாக்கியது. கண்டியின் சில பகுதிகளில் அமைதியற்ற சூழல் நிலவுவதால், அங்குள்ள அனைத்து அரசாங்க பாடசாலைகளுக்கும் விடுமுறை அளிக்கப்பட்டது. அதிகளவில் பொலிஸார் குவிக்கப்பட்டுள்ளனர்.

வட்ஸ்அப், ட்வீட்டர், வைபர் உள்ளிட்ட சமூக ஊடகங்களை கண்காணிக்க இலங்கையின் தொலைத் தொடர்பு ஒழுங்குமுறை ஆணையத்தை அரசு வலியுறுத்தி உள்ளது.

இலங்கை மக்கள் தொகையில் முஸ்லிம்களின் பங்கு பத்து சதவீதம். பெரும்பான்மை சிங்களவர்களின் மக்கள் தொகை 2.1 கோடி.

இங்கையின் முன்னாள் ஜனாதிபதி மகிந்த ராஜபக்ஷ, இது `அரசியல் சதி' என்பதை மறுக்கிறார். அவர், "ஆளும் ஐக்கிய தேசிய கட்சியின் திறன் இன்மையைதான் இது காட்டுகிறது" என்கிறார். மேலும், "இவ்வரசாங்கம் தங்கள் கடமையிலிருந்து தவறி விட்டது" என்றும் கூறி உள்ளார்.

அதுபோல, எதிர்கட்சியான ஜனதா விமுக்தி பெரமுனாவின் தலைவர் அனுரகுமார திசநாயக்க "இந்த அரசாங்கம் மக்களின் முக்கிய பிரச்சினையை கையாள தவறி விட்டது. மக்களின் கவனத்தை திசைதிருப்ப அரசுக்கு கிடைத்த ஒரு வரம் இந்த போராட்டங்கள்" என்றுள்ளார்.

சமூக ஊடகங்கள் மீது விதிக்கப்பட்ட தடையை நியாயப்படுத்தி உள்ளது இலங்கை அரசு. "மதக்கலவரங்கள் பரவுவதை தடுக்க இந்த தடை அத்தியாவசியமானது" என்றுள்ளது.

அமைச்சர் ஹர்ஷா டி சில்வா, "ஃபேஸ்புக்கில் வெறுப்பு பேச்சுகள் அளவுகடந்து சென்றுள்ளன. மக்களை காக்க அரசு விரைவாக செயல்படுவது அவசியம்" என்றுள்ளார்.

இலங்கையின் தொலைத் தொடர்பு ஒழுங்குமுறை ஆணையமும் கண்டி மாகாணத்தில் இணைய சேவையை வரைமுறைப்படுத்துமாறு தொலைபேசி சேவை அளிப்பவர்களை கோரி உள்ளது.

இலங்கை கிரிக்கெட் அணியின் முன்னாள் தலைவர்களான சனத் ஜயசூரிய, குமார் சங்கக்கார மற்றும் மஹேல ஜயவர்தன ஆகியோர் மக்கள் அமைதியாக இருக்க வேண்டும் என்று கோரியிருக்கிறார்கள்.

தனது அடுத்த தலைமுறை உள்நாட்டுப் போருக்குள் தள்ளப்படுவதை தான் விரும்பவில்லை என்று மஹேல ஜயவர்தன கூறியுள்ளார்.

அதேநேரம், அமெரிக்கா, பிரிட்டன் மற்றும் அவுஸ்திரேலியா ஆகிய நாடுகள் இலங்கைக்கு பயணிப்பதை தவிர்க்கும்படி தமது நாட்டு மக்களுக்கு ஆலோசனை வழங்கி உள்ளன.

இந்த அவசர நிலை பத்துநாள் வரை தொடரும். அதன் பின்னர் ஜனாதிபதி இதை நீடிக்கலாமா என்று முடிவெடுப்பார் என்று அமைச்சர் திசாநாயக்க கூறி உள்ளார்.

மேலும் அவர், அதற்கு பாராளுமன்றத்தின் ஒப்புதல் அவசியம் என்றுள்ளார்.

BBC


Add new comment

Or log in with...