காபுல் வெளிநாட்டவர் தங்கும் ஹோட்டலில் தாக்குதல்; 18 பேர் பலி | தினகரன்

காபுல் வெளிநாட்டவர் தங்கும் ஹோட்டலில் தாக்குதல்; 18 பேர் பலி

ஹோட்டலில் தங்கியிருந்தவர்கள் பெட்ஷீட் மூலம் கீழே இறங்க முயற்சித்தனர்

 

- தாக்குதல்தாரிகள் நால்வர் சுட்டுக் கொலை

ஆப்கானிஸ்தானின் தலைநகரான காபுலில் உள்ள புகழ்பெற்ற இண்டகொன்டினன்டல் ஹோட்டலில் இடம்பெற்ற பயங்கரவாத தாக்குதலில் 18 பேர் கொல்லப்பட்டுள்ளனர்.

நேற்று (21) இரவு இடம்பெற்ற இத்தாக்குதலில், 14 வெளிநாட்டவர்களும் 4 ஆப்கானியர்களும் உயிரிழந்துள்ளதாக தெரிய வந்துள்ளது.

இராணுவத்தினர் நடத்திய பதில் தாக்குதலில் தீவிரவாதிகள் மூவர் சுட்டுக் கொல்லப்பட்டனர்.

காபுல் நகரில் புகழ்பெற்ற இன்டர்கான்டினென்டல் ஹோட்டல் அமைந்துள்ளது. இந்த ஹோட்டலுக்குள் நேற்று இரவு தானியங்கி துப்பாக்கிகள், உள்ளிட்ட பயங்கர ஆயுதங்களுடன் 4 தீவீரவாதிகள் உள்ளே புகுந்துள்ளனர்.

அந்த ஹோட்டலில் இருந்த சுற்றுலாப் பயணிகள் பலரை பணயக் கைதிகளாகப் பிடித்துவைத்து மிரட்டல் விடுத்தனர். இதையடுத்து, இராணுவத்தினர் தகவல் தெரிவிக்கப்பட்டு வரவழைக்கப்பட்டனர். அவர்கள் ஹோட்டலைச் சுற்றிவளைத்து தங்கள் கட்டுப்பாட்டுக்கள் கொண்டு வந்துள்ளனர்.

தீவிரவாதிகளின் துப்பாக்கிச் சூட்டுக்கு, இராணுவத்தினர் பதிலடி கொடுத்தனர். இன்று காலைவரை துப்பாக்கி சண்டை நீடித்த நிலையில், அந்த 4 தீவிரவாதிகளும் சுட்டுக் கொல்லப்பட்டனர்.

அதேசமயம், தீவிரவாதிகள் நடத்திய துப்பாக்கிச் சூட்டில் 14 வெளிநாட்டவர்கள் உள்ளிட்ட 18 பேர் பலியாகியுள்ளனர்.

இரு தரப்புக்கும் நேற்று இரவு முதல் நீடித்த துப்பாக்கி சண்டை இன்று காலை வரை நீடித்தது. ஹோட்டலில் இருந்த 41 வெளி நாட்டினர் உள்ளிட்ட 153 பேர் பத்திரமாக மீட்கப்பட்டனர். அதேசமயம், துப்பாக்கி சூட்டில் 9 உக்ரேனியர்கள், கிரேக்க நாட்டவர் ஒருவர், ஜேர்மனியர் ஒருவர், கசகஸ்தானியர் ஒருவர் உள்ளிட்டோர் பலியாகியுள்ளதாகவும் மற்றும் இருவர் எந்த நாட்டைச் சேர்ந்தவர்கள் என அடையாளம் காணப்படவில்லை காபுல் சிரேஷ்ட பொலிஸ் அதிகாரி சலீம் எஹ்சாஸ் தெரிவித்துள்ளார்.

இது குறித்து வெளியுறவுத்துறை செய்தித் தொடர்பாளர் நஜீப் டேனிஷ் கூறுகையில், 'ஹோட்டலில் பதுங்கி இருந்த தீவிரவாதிகள் 4 பேரையும் பாதுகாப்பு படையினர் சுட்டுக் கொன்றனர்.

ஏராளமான பயணிகள் ஹோட்டலின் மாடியில் இருந்து பெட்ஷீட் மூலம் கீழே இறங்க முயற்சித்து விழுந்து காயமடைந்தனர். அவர்கள் மீட்கப்பட்டு மருத்துவமனையில் சிகிச்சைக்காக அனுமதிக்கப்பட்டனர். இதுவரை இந்த தாக்குதலுக்கு எந்த தீவிரவாத அமைப்பும பொறுப்பு ஏற்கவில்லை.'' என நஜீப் டேனிஷ் தெரிவித்தார்.

 


Add new comment

Or log in with...