ஒருங்கிணைப்பு குழுக்களுக்கு அரசின் அடியாட்கள் | தினகரன்

ஒருங்கிணைப்பு குழுக்களுக்கு அரசின் அடியாட்கள்

மாவட்ட மற்றும் பிரதேச ஒருங்கிணைப்பு குழுக்களுக்கு மக்கள் பிரதிநிதிகள் அல்லாத தேர்தலில் தோல்வியடைந்த அரசியல்வாதிகள் நியமிக்கப்படுவதூடாக அரச நிதி தவறாக பயன்படுத்தப்படுவதாக ஜே.வி.பி. நேற்று பாராளுமன்றத்தில் குற்றஞ்சாட்டியது. நல்லாட்சி அரசிற்குள் ஏற்பட்டுள்ள பிரச்சினையை தீர்க்க இரு கட்சிகளையும் பிரதிநிதித்துவப்படுத்தி தகைமையில்லாத கட்சி பிரதிநிதிகள் இவ்வாறு நியமிக்கப்பட்டுள்ளதை அனுமதிக்க முடியாதென ஜே.வி.பி.தலைவர் அநுர குமார திசாநாயக்க தெரிவித்தார்.

வாய்மூல விடைக்காக ஜே.வி.பி பாராளுமன்ற உறுப்பினர் நளின் ஜெயதிஸ்ஸ எழுப்பிய கேள்வியின் போது இடையீட்டு கேள்வி ஒன்றை எழுப்பிய போதே அவர் இந்த குற்றச்சாட்டை தெரிவித்தார்.

இதற்கு பதிலளித்த உள்நாட்டலுவல்கள் அமைச்சர் வஜிர அபேவர்தன, மக்கள் பிரதிநிதிகள் அல்லாதவர்களை ஒருங்கிணைப்பு குழுக்களுக்கு நியமிக்க சட்டத்தில் எந்த தடையும்

கிடையாதெனவும் தேவையாயின் ஜே.வி.பி மக்கள் பிரதிநிதிகளையும் அபிவிருத்தி குழுக் கூட்டங்களுக்கு பொறுப்பாக நியமிக்க முடியும் என்றும் அவர் குறிப்பிட்டார்.

மாவட்ட மற்றும் பிரதேச ஒருங்கிணைப்பு குழுக்களுக்கு நியமிக்கப்பட்டுள்ள இணை தலைவர்கள் குறித்தும் அதில் உள்ள எம்.பிகள் மற்றும் மாகாணசபை உறுப்பினர்கள் அல்லாத நபர்கள் குறித்தும் வினவப்பட்டிருந்தது.

இடையீட்டுக் கேள்வி ஒன்றை எழுப்பிய அநுர குமார திசானாயக்க எம்.பி. மாவட்ட மற்றும் பிரதேச ஒருங்கிணைப்பு குழுக்களுக்கு மக்கள் பிரதிநிதிகள் அல்லாதவர்களை நியமிப்பது தான் நல்லாட்சியா? ஒவ்வொரு தொகுதிக்கும் ஐ.தே.க மற்றும் சு.க சார்பில் நியமிக்கும் குழுக்களுக்கு இவ்வாறானவர்களை நியமிப்பதில் ஆட்சேபனை கிடையாது. ஆனால் நாட்டின் நிதி மற்றும் நிர்வாகம் தொடர்பில் மேற்பார்வை செய்யும் பணிக்கு அரசாங்கத்தின் அடிவருடிகளை எவ்வாறு நியமிக்க முடியும். பிரதேச எம்.பிக்கள் இருந்த போதும் இவ்வாறு தேர்தலில் தோற்றவர்கள் குழு தலைவர்களா நியமிக்கப்பட்டுள்ளனர் என்றார்.

ஷம்ஸ் பாஹிம்,மகேஸ்வரன் பிரசாத் 


Add new comment

CAPTCHA
This question is for testing whether or not you are a human visitor and to prevent automated spam submissions.
Image CAPTCHA
Enter the characters shown in the image.

Or log in with...